أتفضلو أتفضلو هتنبسطو هتنبسطو

انا انطرشت ياهرم

2007-04-08T05:00:00.000-07:00

المفروض يبقي العنوان انا اتعميت ياهرم بس بصراحه اللي حصلي اني انطرشت مش انطرشت اوي بس قعدت يوم من غير مسمع بودني اليمين وطبعا قامت الدنيا ومقعدتش وفضلت افرك واحرك واعمل افلام ........بس بصراحه اول مره في حياتي يجيني احساس ان الناس ممكن تتكلم وانا مسمعش اي كلام وحتي ممكن يتكلموا عليا وانا طبعا في التراوة ومش فاهم اي حاجه بس الاحساس بجد اللي حركني ان الناس اللي مبتسمعش دي احساسها صعب جدا ,,,يعني الناس كلها بتتكلم وهما مش فاهمين حاجه وممكن بالعافيه يقروا الشفايف احساس صعب جدا ان الانسان ميعرفش يتواصل ويتفاهم مع الناس وعرفت اد ايه ربنا ادنا نعم بس احنا مش حاسين بيها ومش مقدرينها ابدا واللي بيقدرها بس هوا اللي فقدها يعني اللي فقد السمع هوا بس اللي حاسس بفقدان نعمة السمع .....

المهم بعد معدي اليوم ورجعت من برة روحت واخد نفسي وعلي اقرب دكتور المهم انا طبعا كنت متنرفز وعلي اخري وكنت ناوي لو اتخنقت اكتر اضرب الدكتور .. منا بقي مش ناقص دكتور يتعلم في ودني المهم من هنا لهنا الراجل كان اخر ذوق ولذيذ المهم جاب منظار وراح باصص جوا ام ودني وراح ضاحك وقلي اخس ...طبعا انا فهمت اللي فيها وان ودني مسدوده بالشمع المهم راح جاب محلول تنظيف وراح عملي ودني المهم لما فهمته اني مبحطش حاجه جوا ودني عشان كده الشمع كان جوا جوا ودني قلي انتا صح ومتحطش اي حاجه جوا ودنك يحسن تخرق ودنك طبعا انا عارف المعلومه دي بس المهم لما نضف ودني نزل منها ظلطه كده تحس انها من حجر الجرانيت او البزلت المهم طلعت بره ودني وسمعت المهم بقي واللي ضحكني موت انه جاب شوكة رنانة كده من بتاعه التردد والموجات الصوتيه وراحه مقربها من ودني وقلي سمعت قلتله لاء المهم راح حطاطها علي سناني المهم سمعت الشوكة ازاي انا مش عارف .... بس الامانه لما لقيته جاب الشوكة قلت بس دا هيجيب الشاكوش ويروح ضربني علي رجليا منا ناقص بقي تجارب في كل اتجاه بس الشهاده الراجل طلع لذيذ اوي وبس شكرته واخدت نفسي ومشيت بس ولقيت نفسي بسمع بس اسه كان يوم دراما ووار كده ...ودعيت ربنا ميحرمش حد من نعمة ربنا ادهالة عشان النعمة دي بجد نعمة ...

أنـــــــــــــــــــــــــــــــــــــــــا ....

مبارك ياجمي محل الحاتي

2007-03-31T13:39:00.000-07:00

في لحظه مرت في تفكير عميق وتخيل وكأنها ساعة من حلم يقظه ......ومن الاخر قلت كده ماهو مدام الشعب مبيقولش حاجه وعادي ومنا قبلك عشت لوحدي .... انا بقي قلت (انا بس مدايق) ..... وعلي ايه هدايق ياكش تولع منا ذيهم واللي ماشي عليا ماشي عليهم منا برضه تقريبا من الشعب ...بما انه تم الانتهاء من الموافقه علي التعديلات الذكيه التي تنص علي مزيد من فشخ المواطن البسيط الذي يتكون فطاره من فول وطعميه وكلها منتجات ذكيه يوردها الاقطاعي المشهور صاحب اراضي الفول وصاحب اكبر محلات للكفته و التي يتعاطها الشعب بكل فخر من كل مداخل ومخارج جسمه وهو مستكيف

وبما ان الشعب موافق علي التعديلات والتحولات والتسولات بنسبة اعلي من نسبة العاطلين والمتسولين والفقراء والجعانين يبقي مفيش مشكله ... ...!

وبما ان الشعب معترضش من الاول

اذن لن يعترض علي اي شئ تاني وحتي لو فكر يعترض صاحب اراضي الفول هيقطع عنه الميه والنور وحصه الفول المسوس

وبعدين ربنا يكون في عون صاحب اراضي الفول لازم بقي نقف وقفه حق ونشتم الشعب اللي شبابه قاعد في البيت وعايز صاحب ارض الفول يوصله الرضعه لحد باب بؤه والنبي يعمل صاحب اراضي الفول المسكين الغلبان مع شباب مش عايز يشتغل وعواطلي وقاعد طول النهار.......!

العيل من دول عايز يضربلي سجاره البانجو ويقعد يتفرج علي التيلفزيون طول النهار ولوعايز يحب يتصل بزيرو تلت اربعات ولو عايزيتجوز يتصل بزيرو تلت عشرات والله ياصاحب ارض الفول كويس انك مستحملنا ومستحمل الشعب دا ... دا احنا محدش عاش معانا وعمرالهكسوس هربوا مننا الانجليز طفشوا منناوكويس انك قاعدلنا

وعموما لو زهقت مننا تقدر تخلي الواد البكري يمسك اراضي الفول وبرضه محلات الكفته والطرب بس ابوس ايدك بلاش طرب يحسن قفا الشعب استوا طرب وكفايه الكفته اللي بيتعطاها وكانها دوا لبوس

وفي النهايه خليكوا فاكرين ساعه لما يعتزل ابو جيمس لن ينجح احد وكله اجاباته هنبقي غلط والعقول كلها هتبقي زلط الا طبعا جيمس حبيب قلبي وطبعا هوا اللي هياخد الشعار بتاع بابا الحاتي

وجميعا سننحني تعظيما واجلالا مش احتراما بس عشان ناخد حصه الكفته وهياخدنا ورا الجبل عشان ياخد الساعه ديه بس اللي يتاخد منه ساعته كانه فرط في منخيره

واخيرا سنرفع جميعا شعار ( كلو كفته الحاتي اللي ماكل الشعب الواطي بالجزمه ومخليه مطاطي ) اوعي حد يفهمني غلط

حبيبي يابو جيمس وضرب نار للصباح الباكر ولوولووووووويىىىىىىىى

هيدخلولنا الكهربا يأم باتعه

هديخلولنا التيلفونات يأم باتعه

وكله في مصلحه الشعب ........ وفي النهايه ...انتصرت ارادة الشعب وايد واستحق التأيد .......دا عند امه يأدهم

ناقص تقولي الشعب عايز دي في دي وزنزانه أيجار جديد وصوفيا لورين تيجي تسكن معاه

وعموما دا كله تهييس ومحدش ياخد علي كلامي

145 جنيه

2007-03-23T11:09:00.000-07:00

مثال للشباب كلهم اتفرج

ابو جريشه بيقول (باركولي ياناس باركولي بعتولى جواب بعتولى اخير وظفوني وعلي مكتب قعدوني وفي اخر الشهر بالكمال والتمام عارفين قبضوني كام ...! 145 جنيه اعمل بيهم ايه ولا ايه هما 145 بس 145 .145 جنيه شوفو انا هعمل بيهم ايه . هروح المول اعملي شوبج ويمكن العب حبه بولينج هجيب عر بيه وهملى التنك وهفتح بكره حساب في البنك 145جنيه

خلاص هتجوز وهبقي عريس واعمل شهر عسل في باريس. احسن شبكه واحسن مهر بس لما اقبض اخر الشهر 145 جنيه

هخلف واد عشا ن يورثني وبحبه كمان بيحسيسني واقوله اسح ادح امبو بكره هيقبض ذي ابوه 145 جنيه ياترى هيعمل بيهم ايه

اكتر من كده عايزين ايه

حد عايز فلوس سلف ) هههههههههههههههههههه

طبعا الكلام مش محتاج اضافه ولا تعليق انا بس عايز احي الراجل اللي كتب كلمات الغنوه دي واقوله ان شاء الله بعد سنه تاخد زيادة 7% وان شاء الله هيبقو 150 جنيه وساعتها الدنيا هتضحكلك

tiny love story

2007-03-21T11:09:00.000-07:00

at one time there were guy looking for the lost love he always miss .. he stay looking for it for long time , cry and cry more than anyone think to the moment he found a girl .

girl like all the girls but she's not like girls , she's like the angels and as known no one can see the angels even in the dreams then he talked to her and after three months he found suddenly that he in love with her , if she just ask him to give her his spirit he'll not hestaite to give her his whole life .

after little days he found that she'll never ever become his wife in the future or even in the next life so he decided to let her alone and forget her even he'll die after the farewell and she decide the same thing but they couldn't to do it in the first but after time they found that they have to forget becouse they live only one life time . day by day till three years he forgot her and he miss the lost love he always looking for

موت ياحمار

2007-03-12T13:19:00.000-07:00

سمعت طراطيش كلام ان في تعديلات ذكيه في التمام مش عارف ياخويا ماده كام وذلك بناء عن طلب واحد شمام مش عارف من اني بتاع وعامل نفسه شجاع والناس هترفض بالاجماع

المهم بعد الخداع وبعد طول التأثير علي الاسماع واهو كله كلام وبتاع

انا بقي نفسي اعرف وبجد مش هأرف انا بعد ماكلت كيلو اللحمه ابو الفين جنيه والناس راكبه كلها عربيه كوبيه هنبص لتعديل ولا حتي تحويل ولا انا كلامي هبل وعايش انا في جبل مانا مش قادر افهم اللي عايزه علي بيه مظهرايه اي حاجه عايزها بيتحصل والناس كلها بالنسبه ليه معفنه وقيحه وكل مايشوف حد يقوله ( انتا يانيله انتا يامعفن)انا عايز استفسر يبقي ايه لزمه المعفنين اللي مالين المجتمع مش لما يبقوا بني ادمين يبقوا يشاركوا ولما ياكلو لحمه يبقي يفهوا الشعب كله بياكل فول واظن ان في سبب وقرار خارجي بأعطاء كل مواطن في اي حته قاطن جرعه من الفول ولذلك بناء علي طلب صاحب المستوقد عشان كله يتيس وحتي لو حد عايزيقول اه او يرفض برضه يستغبي ويعمل اللي عايزه صاحب المستوقد ولا بلاش صاحب المستوقد نقدر نقول صاحب اراضي الفول واللي البني ادمين عمالين ياكلو فيها ذي الحمير .... لا الفول بيخلص ولا الحمير بتشبع

انا بجد نفسي في تعديل مياه الشرب عشان انا شوفت بام عيني ميه الشرب واتحللت ادامي وطلع منها مجاري ( وربنا طلع منها مجاري انا برضه فركت عيني لما واحد معرفه شغال في شركه انتاج فلاتر وراني ميه الحنفيه اللي كلنا لازقين بوقنا فيها ونازلين شرب منها شكلها ايه وقسم اتحاسب عليه قعدت يومين مشربش ميه بس بعد كده استسلمت وقلت اموت بعدين احسن مموت دلوقتي )عموما انا لسه عايش بس بعد كده مش عارف بقي ايه اللي هيحصل المهم ان محدش فاهم حاجه وكله بيغني وبياكل فول وبيشرب ميه حنفيه وموت ياحمار لو حد عرف يقول لا او حتي اه وشكلنا كلنا هنركب الاتوبيس وهنبقي ذي بتوع الاتوبيس وربنا يستر

يسلام كده لو يوزعوا عربيات بمفاتيحها علي الناس وشقق في ابراج عاليه وكمان يعينوا بوابين نتنك عليهم ونديهم بالجزمه ذي مالشعب واخد بالجزمه ونتفشخر بقي ولا احنا ملناش نفس نتفشخر وربنا مهتفرق مين يبقي صاحب ارض الفول ومش مهم نفضل ناكل فول ومش مهم نشرب ميه مجاري او ترع او حتي مصارف بس ندلع شويه ...انا عايز ادلع واغني ذي مزجانجي ماهو كله بيغني ولا انا مليش نفس وبعدين نبقي نفكر في مين يدينا بالجزمه او حتي يطلع عين اهلنا

انا عبد الجابر من قطاع الحمير ارض الفول المحتله

تتتتتتتيييييييييييييييتتتتتتتتتتتتت

اظاهر الارسال اتقطع

أنـــــــــــــــــــــــــــــــــــــــــــــــــــــا

ألو محمد موجود

2007-03-04T09:25:00.000-08:00

من المعروف ان علاقتي بالبنات مش كتير اوي ومش بحب اعمل علاقات كتير بالبنات .... المهم انا علاقتي قويه ببنت واحده بس ومبحبش اكلمها في البيت عشان معملهاش قلق او حتي اعملها مشاكل المهم قلت اكلمها من تيلفون من الشارع ... قعدت ارن كتير علي تيلفونها المهم ولا حياه لمن تنادي وعملت الموضوع دا كذا مره علي امل انها ترد وبصراحه سبب المكالمه اني كنت شوفتلها شغلانه مناسبه ليها وقلت اتصل بيها واديها نمره التيلفون وبعد محاولات مستميته ورد عليا صوت غريب والله بيان ابوها المهم انا اول مسمعت الصوت وترجمت الموقف اول حاجه قلتها محمد موجود وطبعا دا مش ذكاء خالص لان دا محمول مش تيلفون بيت ثانيا ماهو واحد رد وممكن دا يكون محمد .....ايه الغباء دا انا مش عارف .... المهم قلت محمد غلط قلي محمد مين رحت قايله اسف اظاهر النمره غلط

وبعد فتره تفكير قلت طب منا كنت قلتله علي الموضوع بس انا قلت في نفسي انه هيفتكر اني بتمحك وخلاص

وبعدين قلت خلاص ياواد مفيش حل بقي سيبها لله انا ههزق نفسي ليه وممكن يروح قايلي اقفل يابارد

وانا مش بارد

مش عارف انا صح ولا لاء بس انا حسيس ومش هستحمل اسئل حد عن انسان ويروح منفضلي ويبقي شكلي ذي الملابس الداخليه

وبعدين انا مش عارف الناس دلوقتي بقت بتفكر ازاي يعني ممكن اعملها مشاكل وعموما ربنا ستر ... بس رد الفعل كان غبي اوي وفلاح بدرجه غبيه....يعني من الاخر جيت اكحلها روحت خزقت عيونها بــــــــــــــــــــس

أنـــــــــــــــــــــــــــــــــــــــــــــــــــا

اول يوم شغل

2007-02-28T11:43:00.000-08:00

بكره اول يوم شغل ومش عارف اوصف حالتي .......قلقان. حاسس اني رايح لعالم تاني حاسس اني هتغير وهتعلم وهتكلم

بس انا عندي شويه اهداف وعندي شويه طموحات مبدئيه مش عارف انا هنام ازاي النهارده لما ببقي رايح شغل جديد مبعرفش انام وبفضل سهران افكر واتخيل انا ممكن اقابل ايه والمشكله ان مهما تخيلت وحلمت برضه بيحصل كل شئ عكس المتوقع اظن ان الانسان لو عرف ايه ممكن يقابله مكنش بقي من الغيببيات عموما ارجو يطلعليش في الشغل عفريت قصدي واحد خنيق مانا عارف الواحد لازم يلاقي في كل خرابه عفريت واصحاب الناس اللي في الشغل كلهم وكمان اعمل معاهم صدقات وعلاقات طيبه ....

يعني الانسان صعب يعيش لوحده في المجتمع وعشان كده انا قررت اني اعمل علاقات مع الناس كلها .....عكس مكنت في الكليه لاني كنت في الكليه منتطوي اوي لدرجه ان الناس كانت بتفتكرها تناكه بس هيا والله حاله حزن او انطواء عادي بقي ننسي كل اللي كان ونركز بقي في اللي جاي

أنــــــــــــــــــــــــــــــــــــــــــا

نصيبي

2007-02-26T13:08:00.000-08:00

انا مش حظي وحش اوي ولا حاجه

ناس كتير اوي بتقول ان مفيش شغل في البلد انا موافق بس في حاجه احنا مش بنشوفها .... انا اللي عايز يدور علي شغل هيلاقي شغل

انا مثلا دورت وتخيلو انا جاتلي شغلانه من غير واسطه ولا حاجه

بس في حاجه قلهالي واحد معرفه قال ان لما الشغل بيجي بيجي كله مره واحده وبجد هوا دا اللي حصل معايا

الدنيا لونها مش غامق اوي

ولونها مش حلو اوي ممكن نقول نص نص

انا مبسوط

يمكن اكون بحب

يمكن اكون حزين

انا متلغبط

ه‍‍وا دا نصيبي

سلام دلوقتي

يارب ياربنا الشجره جنبنا

2007-02-22T21:32:00.000-08:00

يارب ياربنا ياريت الشجره عندنا

وصف تفصيلي لمشاهد بتحصل وسمعت عنها

كنت رايح اعمل مقابله في شركه محترمه المهم وانا راكب ورايح كانت الدنيا زحمه جدا لدرجه اني حسيت اني مش هلحق المقابله فقعدت ادعي ربنا يسهلها وفعلا ربنا سهلها ووصلت في معادي بالثانيه وانا بقي راجع ولقيت واحد متشعلق علي شجره كبيره وكأنه راكب اتوبيس وزحمه جامده اوي وبوليس واقف وناس ودنيا تقولش مولد مع ان المكان دا مش من السهل تلاقي حد فيه لانه طريق يعتبر طريق صحراوي بيوصل لحد موقف العاشر من رمضان واللي فهمته ان في علي الشجره كلمه الله ومحمد وطه ولما سمعت انا بصراحه مستغربتش لان قدره الخالق واضحه في كل شئ بس تقول لمين وطبعا مكان الشجره اقلب مولد وطبعا احتمال يشيلوا الشجره نظرا لانها عامله مشكله في الطريق وعشان تيجي من مدينه العبور ولا الشروق لحد وسط البلد اظن لازم تكون صاحب طياره خاصه

اللي انا سمعته

واحد بيقول ان الكلام اللي مكتوب عليها دا واحد حفره من سنتين ولما القشره الخارجيه وقعت الكلام ظهر طبعا انا كنت عايز افهمه انه محتاج يستحمي دلوقتي حالا وضروري

واحد بتقول انها كنت عندها قطه مكتوب عليها الله ..جميل بس يعني القطه دي مظهرتش الا دلوقتي وبعدين هيا ااساسا معندهاش قطط..... ملحوظه البيت عندي كله قطط

وسمعت بقي كلام وحكاوي بس ايه الشعب المصري معار بشكل يفقـــــــــــــــــــــــع

المهم اوي في الموضوع ان الشجره دي بقي لو جنب البيت جنبي ...يسلام دا يبقي طاقه القدر اتفتحلي . الشجره جنبي بقي يعني من الاخر ممكن احوطها بسور ووقف اتنين بودي جارد واعمل تذاكر دخول منا انتهازي بقي وكمان اسعار الشقق هتولع يعني اللي جاي يسكن جاي يسكن جنب الشجره يعني ياسعده ويهناه وكل دا عشان الشجره مكتوب عليها الله .. ونعم بالله بس مش لازم يبقي الخلق كله مكتوب عليه لفظ الجلاله عشان الناس تؤمن بربنا .. بس تقول لمين انا مش مصدق ان الشعب دا بني هرم والله شكل خوفوا وخفرع ومنكورع كانو عاملين اتفاقيه استيراد ترب جاهزه بسعر مخفض من حضاره الصين القديمه ومحدش ذكي يقولي وهما عرفوا الصين منين ......! اكيد كان في مندوب من الصنينين اللي بيخبطوا علي الشقق ويقول عندكوا ميتين

انا افكاري وقفت لحد كده وعندي بلاوي متلتله وربنا يرحمني ويساعدني والسلام عليكم ورحمه الله وبركاته...

أنــــــــــــــــــــــــــــــــــــــا

النت اشتغل لولولوييييييييي

2007-02-21T16:30:00.000-08:00

انا مش مصدق نفسي بجد النت اشتغل وهعد ادون بقي ليل ونهار منا فاضي بقي

المهم بقي مقعدش ادون لنفسي ......نفسي ومنا عيني حد يبعت تعليق انا حاسس اني بدن في مالطه ولا انا بكتب في صحرا

عموما صحرا ولا في اي حته اكيد حد هيدخل البلوج بتاعي ان شالله علي سيبل الغلط وعموما انا متفائل جدا ومعنديش مشكله

بكره بقي اكمل سلام

أديني الحقنه بسرعة ارجوك محتاجه الجرعة

2007-01-23T21:17:00.000-08:00

قبل الخوض في تفاصيل الحقنه والجرعه ..

دعوني اسئل بالفم المليان لماذا لجأ الشباب الي الحقنه والجرعة وكل انواع المخدرات؟؟؟؟؟؟

انا مش هدور علي احصائيات وقول عدد المدمنين في العالم قد كدة وفي امريكا قد كدة واحنا بالنسبه لامريكا نعتبر بنشرب سبارس لا انا عارف ان من اكتر شعب الارض تعاطي للمخدرات هما امريكا ... اذن نبدأ الموضوع بمناقشة السبب الرئيسي لتعاطيها في مصر مش في امريكا

شاب بيقولي بنقلد الامريكان وبي كوول

انا شايف الناس وخصوصا الرجال محدودي الدخل هم من اكتر الناس هروبا للمخدرات

زياده الاسعار وضغوط المعيشه

قله الزواج والسبب معروف

البعد عن الدين او قيم تلزم المواطن بالالتزام مع قلـــــــــــــــــــــــــه الضمير

من غير رغي كتير انا داخل في متن الموضوع اهوة عشان انا عارف انك عايز تسمع ابو ناهيه في الحوار دا

اه ان الامريكان شعب مسالم (اهوه ابتدي ينعر) وشعب روش وبيصدر الموضه والكليبات العريناه بتاعه شاجي وشين بول وكل واحد منهم حبيبي وعلي عيني وراسي وكمان بيصدر الشتيمه وقله الادب ودا غير طبعا البوي فريند والجيرل فريند ....والاهم بيصدروا شرب المرجوانا في الافلام المسخرة بمعني الافلام التريقه واكيد انتو فاهمين ...( امريكان باي) و(سكاري موفي)وطبعا في افلام كتير اوي بس انا قولت اللي جيه علي بالي ......بس ايه موضوع المرجوانا دي ...سهله وبسيطه الامريكان معندهومش بانجو فابيشربوا مارجوانا طبعا الشب التمام اللي عنده بدل العربيه خمسه او سته ومن فرنسا بدله ومن ايطاليا جزمه لازم يقلد الامريكان اصلهم ملايكه نازلين من السما عشان نقلد امهم ........ ملحوظه خطيره..!!! شباب نضيفه بتشرب بانجو وشباب زباله بتشرب بانجو وطبعا فرحانين

انا بقي بقولهم يافرحه العبيط بشخته ......

طيب قلدوا الامريكان في لعب الرياضه في انهم دايما بيستثمروا وقتهم وشغالين طول الوقت وعندهم ساعه الصياعه صياعه وساعه الجد جد بس تقول ايه احنا دايما نحب نستورد زباله العالم

ليه بقي الراجل الغلبان بتاع محدودي الدخل بيضرب مخدرات مع ان ولاده ومراته اولى بالقرش اللي بيدفعه في المخدرات احتمالات كتير علي دماغي بس يلا نقول منهم شويه - البحث عن لحظه نشوي او سعاده عابره (بالعكس البانجو بيهمد الجسم وبيخنق بعد ما الواحد يصحي) بس تقول لمين.... ايه كمان عايز ينسي الديون المتلته علي كتفه ومش عارف يدفعها ... عايز يعمل ليله قشطه مع ام العيال ...طبعا عبيط لان نظرا لنصايح الدكتور ان المعاشره الزوجيه تحتاج الي ذهن خالي وصافي وحاله تأهب من جميع حواس الجسم وطبعا صحبك ابو العيال لما ضرب المصلحه بقي فاتح بقوه ذي الجاموسة الزرايبي وماشي مش شايف ابنه من مراته ..طيب انتا بالله عليك بالحاله بتاعه اخينا دا هيعمل ايه ...دا اخرة يسلك سنانة

وممكن يكون بيضرب عشان التجربه والفضول وفي دي مش هقدر اكلمه لان الانسان عنده حب استطلاع يعني من الاخر هتاكله لو مشربش وانا ميرضينيش انها تاكله ليل ونهار فأنا من هذا المنطلق ((ظبطها تريحك من غير ماتجرحك))

يعني مش لازم تشرب (متناقض)اوي

وسبب كمان الخنقه اللي بتصادف اي حد ودي عادي والناس بتهرب بانهم يتاعطو المخدرات علي امل انها تنسيه القرف سواء من خلقه مراتة العكرة او ولادة اللي مخلينه **** نفسه .... وشغال ذي التور في الساقيه عشان ياكلهم ويجبلهم موبيلات ويلبسهم مركات وطبعا يفسحهم في مارينا في الصيف مع ان كل مرتبه 150 جنيه لا غير بعد الحبشتكنات والحركات

وكمان سبب تاني انا شايف انه مهم جدا .. قله الجواز ودا سبب ذي منتوا عارفين اساسي في السعار الجنسي وانا شخصيا شايف انها انتفاضه التشرد المكبوت جوا الشباب العاطل اللي مش لاقي يتجوز نظرا طبعا لارتفاع تكاليف الجواز وطبعا دي مشكله عالميه(عند امه يادهم) عندنا احنا ازاي وفي زفت اسمها قناه السويس اللي بتجيب دخل دوله تانيه ماعلينا ..مش موضوعنا......المهم الشباب مكبوت فأقل حاجه يعملها شب عنده 27 سنه ممعهوش ولا نكله انه يجري ورا بنت في الشارع .... انا لو مكانه مش هجري انا هعمل اسبرنت

طبعا انا مش بدافع عن الشباب دا لكن في اسباب كتير للي حصل وانا مش هخوض فيها لكن اقدر اقول ان الكبت وعدم الجواز يخلي الشباب يشربوا مش بس بانجو ولا حشيش ولا مخدرات , دا انتا لو ادتهم سم فران هايخدوا مع جزيل الشكر كمان

اخر سبب والاهم علي الاطلاق وانا شايف انا بجد كل مشاكل البلد دي منه هوا انعدام الضمير وقله الدين والاخلاق

انا مش هوعظ حد هنا عشان الناس من حقها تقرر ويكفي اني بس هسرد الاسباب اللي من الممكن تترتب علي تعاطي الشعب دا للمخدرات

ممارسه المحارم للجنس وعلنا بمعني ان الاخ من الممكن يمارس الرزيله مع اخته وطبعا لانه مش في وعيه من الممكن توقع اي شئ منه وكمان تدمير الجيل كله ودا بالظبط اللي عايزه العدو منا وكمان الاهم ان في ناس في البلد مش عايزه الشباب يفكر ويفهم ويعرف حقه وكمان عشان الشباب ميطلعش بالبلد من حاله السكون والتأخر العلمي اللي البلد موجوده فيه من ايام الملك توت ومن ساعه متبني الهرم الاخراني

وكمان التأثيرات العكسيه علي الممارسه الزوجيه (مش كلامي دا كلام الدكاتره)جمع دكتور عشانا انا عارف العسل بتاع الدرعميين

وطبعا الحاله النفسيه السيئه لمدمن المخدرات وغيره وغيره واللي عايز يعمل بحث عن تأثيرالعكسي للمخدرات علي الصحه النفسيه يدور وهيعرف

وفي الاخر لازم اقولها ( اديني الحقنه ارجوك محتاجه الجرعه ) وطبعا لازم اقولها زي ماقلها حبيبي

هقول لكل شاب وكل فتاه لا تنحرف وان صحبك اداك جوان او مسمار او حتي خبور سيبك منه وقله ياعم انا عايز اكون فايق مش مبضووووووون

ومش هنسي دي وصله لمنظر والبانجو بيتباع علني وبيتشرب علني في الافراح والغرز

http://www.youtube.com/watch?v=Bqb9ntHb0Bk

اتفرجوا وقولوا رايكم ومتنسوش التعليقات

بسم الله اول القصيدة .......

2007-01-22T19:58:00.000-08:00

في العادي بحب اول مصحي اشوف ايه اللي بيحصل في البلد . وقد كان فتحت صفحه اخباريه ولقيت الخبر التالي .....

اتهمت مباحث الاموال العامة رسميا خلال تحقيقات النيابة التي اجرتها اليوم في قضية اكياس الدم الملوثة الدكتور هاني سرور عضو مجلس الشعب ورئيس شركة هايدلينا بتزوير رخصة خط انتاج اكياس الدم.

وهوا دا الخبر

طبعا دا اول القصيده

الموضوع طبعا مش محتاج مني اضافه ولا تعليق بس اقدر اقول ان من الاخر ...المواطن المصري بقي ملوش لزمه بمعني ان لو مات في داهيه وعلي رأي البهظ بيه ......ياسيدي خليها تخف وخلوا بالكو ان احنا بنينا تلت اهرامات يعني حتي لو واحد نقلولوا دم ملوث حتي بالاديز مش هيجرالوا حاجه والايدز هوا اللي هيجرالوا ......!!!! طبعا لان المصريين عندهم صحه تكفي بلد وانا مش بقر . ربنا يدي المصريين الصحه والعافيه ويصبرهم علي الدم الملوث والمياه الملوثه وكمان مستوي ارتفاع التلوث في القاهره الي عشره اضعاف المستوي العادي اللي ممكن يعيش فيه بني ادم ....ومننساش الاكل الي كله اسمده مسرطنه وبلاش اكمل عشان نفسكوا متتسدش انا عارف الشعب دا اكيل وبيموت في الطبيخ ....... اختصارا دا شئ بسيط واحنا قده وقدود واللي خلنا نعبر القناه وفيها نبالم يخلينا نعيش حتي بدم ملوث .......!!!!!! وعلي رأي الزعيم احنــــــــــــــــــــــــــا بتوع النبالم